Canzona per Bastia

U ventu hà pulitu li tetti
U campanile di Santa Maria
Scrive lu celu è l'architettu
Di l'universu a puesia

Vecu Ficaghjola è San Ghjisè
E Filippine è Sant'Antone
U mare estrosu quandu ci hè
A sciuma bianca di e mio canzone

In San'Niculà e guivanette
Spazzanu u sole e li cori
Trianguleghjanu le bissiclette
I vechji riden'à li ciucci novi

U portu vechju sente u caffè
Musca u pesciu è l'acqua vita
Tanti batelli ch'un sò per mè
Gira lu capu gira la vita

Bastia canta pè le cantine
Rock è paghjelle opera'inseme
Pett'à culombu li canterini
Mez'à e fole di dopu cena

Giranduleghjanu per a moi cità
I fondi e strette è po le piazze
Cercu la robba dà cantà
Incù e rime un pocu pazze

Bastia in zerga pè li carrughji
Introna lu ghjornu è la notte
Ancu i silenzii diventanu mughji
Bastia rise Bastia lotte

Bastia hè scema Bastia Ride
A tutte l'ore notte è ghjornu
S'è tù sì tristu ti cercu à lite
Bastia pienghje è ride torna.

U ventu hà pulitu li tetti
U campanile di Santa Maria
Scrive lu celu è l'architettu
Di l'universu a puesia

P. Croce / P.F. Nasica